5 июня (23 мая) Собор Ростово-Ярославских святыхСвятителей и чудотворцев Ростовских – Леонтия, Исайи, Игнатия, Иакова, Феодора, Димитрия, Арсения; Авраамия архимандрита, Петра царевича Ордынского, блаженного Иоанна Власатого Милостивого, Иринарха затворника, блаженного Исидора, князя Василька;
Ярославских чудотворцев – благоверных князей Василия и Константина, Феодора и чад его Давида и Константина;
Переславских чудотворцев – преподобных Никиты столпника, Даниила, благоверного князя Андрея, благоверного великого князя Александра Невского;
Угличских чудотворцев – страстотерпца благоверного князя царевича Димитрия, преподобных Игнатия, Кассиана, Паисия, благоверного князя Романа;
Пошехонских чудотворцев – преподобных Адриана и Севастиана, Сильвестра Обнорского, Геннадия Любимоградского и Костромского.

Тропарь святителям Ростовским, глас 4-й

Святителие премудрии, паствы вашея учителие богопросвещеннии, веру евангельскую в людех преумноживши, любве Небесныя на земли достоподражательнии образи, люди страны Ростовския и Ярославския приобщавши спасению, служителие воистинну Божии и сопричастницы апостолов достойни явилися есте, Леонтие священномучениче, Исайе, Игнатие, Иакове, Феодоре и златословесниче Российский Димитрие, Христа Бога молите о архиереех, на престоле вашем преемницех, о людех, благочестно вас почитающих, о стране нашей православней и о всей Христовой Церкви.

Тропарь, гл. 4

О благочестный соборе, / о людие избраннии, / святителие, преподобнии и праведнии, / и благовернии граждане российстии, / яко звезды, на тверди церковней / страны Ростовския и Ярославския к Богу предстателие, / величаем с любовию вас, по плоти наших сродников. / Вы же молитеся даровати мир стране и Церкви нашей, / благословение и милость Божию всем людем, / всепрощение и спасение, / ходатаи бо есте приснии о нас ко Святей Троице.

Молитва святым земли Ростовския и Ярославския

О святии угодницы Божии, Божии друзи, человецы Христовы, святителие и преподобнии и вси, в Церкви прославлении! Евангелие проповедавшие словом и жизнию, подвигом добрым подвизастеся в земли Ростовстей и Ярославстей, восприяли есте на небесех венец правды, егоже уготовал есть Господь всем любящим Его. Темже взирающе на святый ваш образ, радуемся о преславнем скончании жительства вашего и чтим святую память вашу. Вы же, предстоя Престолу Божию, приимите моления наша и ко Всемилостивому Богу принесите, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством вашим, аще и недостойни есмы, видети благая на земли живых, славяще единаго во святых своих славимаго Бога, Отца и Сына и Святаго Духа, ныне и присно и во веки веков.

Аминь

Молитва святителю Леонтию епископу Ростовскому

О священная главо, преславный чудотворче, первопастырю святыя Ростовския Церкве, святителю отче Леонтие! К тебе припадаем и молимся мы, смиреннии и грешнии и, яко отца чадолюбиваго, просим: всели в сердца наша любовь твою, еюже к Богу и ближним твоим при жизни твоей преисполнен был еси, яко и душу твою за паству твою положил еси, мученически пострадав от идолослужителей, научи нас, отче, тебе подражати верно, Бога и ближних наших любити искренно и заповеди Господни совершати непогрешительно, да будем и мы чада твоя не по имени токмо, но самым делом и всем житием нашим. Молися, угодниче Божий, ко Христу Богу о святей Православной Церкви и державе Россииской: да пребудут в мире и благостоянии и процветают в благочестии христианстем непоколебимы. Соблюди град твой Ростов и вся грады и веси страны Россйиския невредимы от всякаго зла. Призри благоутробно на всяку душу христианскую, милости и помощи от тебе ищущую, буди всем нам в болезнех целитель, в скорбех утешитель, в печалех избавитель, в бедах помощник, в час смертный покровитель; да при помощи молитв твоих святых сподобимся и мы, грешнии, спасение вечное получити и Царствие Христово унаследовати. Ей, святителю Христов! не посрами упования нашего, еже по Бозе и Пресвятей Богородице на тя крепко возлагаем, но яви нам твое многомощное заступление, да хвалим, славим и величаем великое человеколюбие дивнаго во святых Своих Бога Отца, и Сына, и Святаго Духа, во веки веков.

Аминь.